"Indi alma mövsümüdür, bundan istifadə etmək lazımdır, məsələn alma cemi bişirmək" Dünən belə fikirləşdim və qollarımı çırmalayıb işə başladım.
Əvvəlcə maraqlı bir film tapdım ki, almaları soyub doğrayanda vaxtım boşa getməsin. İlk olaraq almaları yudum, hər birini dörd yerə bölüb qabığını soydum. Cem ətirli olsun deyə iki heyvanı da soyub doğrayıb almalara qatdım. Hamısı birlikdə iki kq oldu.
Doğranmış meyvələrin üzərinə 1.5 kq şəkər tozu və iki stəkan su əlavə etdim. Qazın üzərinə qoyub tez-tez qarışdıraraq bişirməyə başladım.
Cemin üzərinə çıxan ağ köüyü yığmaq lazımdır. Yarım saat qaynadıqdan sonra meyvələr əzilməyə başladı. Püre əzən alətlə onları əzdim, sona yaxın cem bərkiyir və yapışmağa başlayır. Bu zaman dayanmadan qarışdırmaq lazımdır.
Təxminən bir saata cem hazır oldu, dadı və ətri çox gözəldir. Cemdən səhər yeməyində və şirniyyatlarda içlik kimi istifadə etmək olar.
Hələ ki, alma boldur, yəqin bir dəfə də belə cem bişirərəm. Qış uzunu piroqların və kruassanların içinə qoymağa marketdən deyil, evdə hazırladığım cemdən içlik hazırlamaq daha xoş olacaq.
